११ सर्जकलाई प्रज्ञा पुरस्कार
पुष ०१, २०७७
पुस १, नेपाल प्रज्ञा–प्रतिष्ठानको ३५औँ प्राज्ञसभाले विभिन्न विज्ञ र स्रष्टालाई पुरस्कृत गर्ने निर्णय गरेको छ। प्रज्ञाले दुई लाख रुपैयाँको ‘नेपाल सामाजिक शास्त्ररसंस्कृतिरदर्शनशास्त्र पुरस्कार’ प्रा.डा. वीरेन्द्रप्रसाद मिश्र र ‘नेपाल प्रज्ञा भाषा पुरस्कार’ प्रा.डा. तेजरत्न कंसाकारलाई प्रदान गर्ने निर्णय गरेको छ ।
त्यस्तै, एक लाख राशिको ‘नेपाल प्रज्ञा नेपाली साहित्य पुरस्कार’ हरिहर खनाल र रविमान लम्जेल तथा हिमाल, पहाड र तराईमा बोलिने मातृभाषा साहित्यतर्फ पूर्ण वैद्य, इन्द्रबहादुर गुरुङ, चतुर्भजलाल दास केवरत र हंसावती कुर्मीलाई प्रदान गर्ने निर्णय गरिएको सदस्य सचिव प्रा. जगतप्रसाद उपाध्यायले बताए ।
प्रज्ञाले दुईदुई लाख राशिको ‘भानु प्रज्ञा अन्तरदेशीय नेपाली साहित्य पुरस्कार’ भारतको आसामका लीलबहादुर क्षेत्री, ‘नेपाल प्रज्ञा अनुवाद पुरस्कार’ कृष्णप्रकाश श्रेष्ठ र विदेशी नागरिकलाई दिइने तीन हजार अमेरिकी डलरको ‘नेपाल प्रज्ञालङ्कार सम्मान’ चीनका प्रा. वाङ हङ्वेईलाई प्रदान गर्ने निर्णय गरेको छ।
यसैगरि प्रज्ञाले डा. महेशराज पन्त र प्रा.डा. सूर्यप्रसाद सुवेदीलाई प्रज्ञा–प्रतिष्ठानको मानार्थ सदस्यता र आनन्ददेव भट्टलाई आजीवन सदस्यता प्रदान गर्ने निर्णय गरेको छ। प्रज्ञासभाले गत आर्थिक वर्षको खर्च पारित गर्दै चालु आथिक वर्षका लागि १९ करोड ५० लाखको बजेट पारित गरेको छ। सभाले वार्षिक नीति र कार्यक्रमसमेत पारित गरेको छ।
बैठकमा कुलपति गङ्गाप्रसाद उप्रेतीले प्रज्ञा–प्रतिष्ठानले गरिरहेका कार्यक्रमको समीक्षा र भावी कार्यक्रमिक योजनाबारे सभामा छलफल भएको बताए।
