सभामुखले बोलाएको सर्वदलीय बैठकमा एमाले सहभागी हुँदैन : सचेतक चौधरी
भदौ २८, २०७८
भदौ २८, सभामुख अग्निप्रसाद सापकोटाले सोमबार अढाइ बजे बोलाएको सर्वदलीय बैठकमा प्रमुख प्रतिपक्षी दल एमाले सहभागी नहुने भएको छ । आफ्ना १४ जना सांसदलाई पदबाट बर्खास्त गरेको सूचना सभामुखले प्रकाशित नगरेसम्म त्यस्तो बैठकमा सहभागी हुनुको अर्थ नरहेको एमाले संसदीय दलकी सचेतक शान्ता चौधरीले बताइन् ।
‘बैठकमा पार्टी सहभागी नहुने कुरा छ, हाम्रा १४ सांसदलाई बर्खास्त नगरिएसम्म त्यस्तो बैठकमा सहभागी हुनुको अर्थ पनि छैन, उनले काठमाडौं प्रेससँग भनिन्, अहिलेको विवाद अन्य दलहरूसँग होइन, सभामुख र एमालेबीचको हो । त्यसैले अन्य दलसँग बस्नुको औचित्य पनि छैन । पार्टीले आधिकारिक रूपमा सभामुखको राजीनामा मागेको जानकारी आफूलाई नभएको चौधरीले बताइन् ।
