आर्यन र प्रदीपलाई लिएर बायोपिक फिल्म बनाउँदै : निर्देशक दिनेश राउत
माघ ०३, २०७९
फिल्म निर्देशनमा आफूलाई परिपक्व बनाउँदै लगेका निर्देशक हुन्, दिनेश राउत । ‘आई एम सरी’, ‘नोभेम्बर रेन’, ‘क्लासिक’ जस्ता लभस्टोरी फिल्मबाट प्रेम सिकाउने निर्देशकको परिचय बनाएका उनले ‘प्रसाद’ र ‘प्रकाश’ फिल्मबाट नेपाली समाजभित्रको गम्भीर र संवेदनशील मुद्धालाई पस्किएर निर्देशनमा नयाँ उचाईं हासिल गरेका छन् । अब उनलाई हलुका भएर काम गर्न अनुमति छैन ।
‘प्रकाश’पछि मौन झैं रहेका दिनेश यतिबेला दुईवटा प्रोजेक्टको तयारीमा छन् । सम्भवत चाँडै नै उनले निर्देशन गर्ने एक लभस्टोरी फिल्मको घोषणा हुनेछ । अर्को प्रोजेक्ट भने २०८० सालको अन्तिमतिर निर्माण हुन सक्नेछ, जसको अहिले प्रि(प्रोडक्सनको काम भइरहेको छ । करिब ६०\७० वर्ष अगाडिको कथामा निर्माण हुने फिल्म बायोपिक रहेको उनले जानकारी दिए ।
फिल्ममा अभिनेताद्वय आर्यन सिग्देल र प्रदीप खड्काको अभिनय रहनेछ । तर, दुवैसँग कागजी सम्झौता भएको छैन । निर्देशक राउतसँग दुवै नजिक रहेकाले मौखिक सहमति भने भैसकेको छ । दिनेशले भने, यो फिल्मको प्रि-प्रोडक्सनमा लामो समय लाग्छ । डेढ\दुई वर्षै लाग्ला । त्यसैले अहिले धेरै कुरा भन्न सकिँदैन । यो बायोपिक हो । यसमा आर्यन र प्रदीपलाई लिने मेरो सोच हो ।
‘क्लासिक’ पछि दिनेश र आर्यनबीच सहकार्य हुन लागेको हो । बीचमा उनीहरुबीच एक प्रोजेक्टको तयारी भए पनि त्यसले आकार लिन सकेन । कुनै बेला आर्यनको खस्किँदो करिअर बचाउन दिनेशले ‘नोभेम्बर रेन’मार्फत् ठूलो भूमिका खेलेका थिए । उनीहरु मिल्ने साथी समेत हुन् । आजभोली राउत प्रदीपसँग नजिक छन् । अब उनी आफ्ना दुई प्रिय पात्रलाई एकसाथ पर्दामा उतार्दैछन् ।
