अभिनय प्रतियोगिताको तुलसीपुर अडिसन सम्पन्न
जेठ २६, २०८०
तुलसीपुर, २६ जेठ । चलचित्र विकास बोर्डको आयोजना तथा चलचित्र पत्रकार संघ दाङको सहकार्यमा पहिलो चरणको अभिनय प्रतियोगिता अन्तर्गत आज तुलसीपुरमा अडिसन सम्पन्न भएको छ । बालबालिकालाई कलाकारितासँग जोड्ने र भविष्यमा राम्रा चलचित्र निर्माणका लागि दक्ष कलाकारहरू उत्पादनमा सहयोग पुग्ने उद्देश्यका साथ यो कार्यक्रमको आयोजना गरिएको हाे ।
प्रतियोगितामा २६ बढी बालबालिकाहरु सहभागी थिए । प्रतियोगितामा छनौट भएका प्रतियोगीहरूले आगामी असार १ देखि ३ गतेसम्म घोराहीमा सञ्चालन हुन लागेको राष्ट्रिय बाल चलचित्र महोत्सवमा भाग लिन पाउनेछन् । आज भएको छनौट प्रतियोगिताबाट १० जना कलाकारहरू छनौट हुने छन् ।
चलचित्र पत्रकार संघ दाङ शाखाका अध्यक्ष सन्तोष केसीको अध्यक्षतामा सञ्चालित कार्यक्रमको सहजीकरण सचिव निरला अर्यालले गर्नुभएको थियो । प्रतियोगिताको निर्णायकमा चलचित्र पत्रकार संघ दाङका सल्लाहकार चेतन रेग्मी, शरद रेग्मी संघका निवर्तमान अध्यक्ष शिव पुन र कलाकार झग्गु भण्डारी रहनुभएकाे थियाे ।
