‘धड्कन’ को सिक्वेल बनाउँदै नरेश
बैशाख १८, २०७९
१६ वर्ष अगाडिको हिट फिल्म ‘धड्कन’को सिक्वेल बन्ने भएको छ । निर्देशक नरेश पौडेलले नै फिल्मको सिक्वेल बनाउन लागेका हुन् । सिक्वेलको काम सुरु भएको निर्देशक पौडेलले बताए । ‘‘धड्कन २’ को काम केही अगाडि सुरु भएको छ’ पौडेलले भने, ‘अहिले लेखन कार्य भइरहेको हो । त्यसपछि अन्य काम अगाडि बढ्नेछ ।’
फिल्मको लेखन मौनता श्रेष्ठले गरिरहेका छन् । ‘धड्कन’ को कथा पनि मौनताले लेखेका थिए । प्रेमकथामा बन्ने फिल्म भदौबाट छायाङ्कनमा लैजाने तयारी नरेशको छ । ‘धड्कन’ सुपरहिट फिल्म हो । रेखा थापा, अरुणिमा लम्साल, रमित ढुंगाना, निखिल उप्रेतीको मुख्य भूमिका रहेको फिल्मका गीत संगीत समेत हिट छन् ।
‘हिरो, ‘धड्कन’, ‘दीपशिखा’, ‘अभिमन्यू’ लगायतका फिल्म निर्देशन गरेका नरेशले ‘धड्कन २’ मा अहिले चलेका कलाकार रहने बताए ।
