ब्लकबस्टर फिल्म‘छ माया छपक्कै र छक्का पन्जा ३’अब एपबाट हेर्न सकिने!
असार ०४, २०७७
केहीदिन अगाडि निर्माता तथा कलाकार दीपकराज गिरीले परदेशमा रहेका दर्शकहरूका लागि ‘छक्का पन्जा ३ र छ माया छपक्कै’ एउटा नयाँ एपमा रिलिज हुन लागेको जानकारी दिएका थिए ।
युट्युबमा सार्वजनिक नभएका यी दुवै चलचित्र कुन एपमा रिलिज हुन लागेको होला भन्ने कौतुहलता दर्शकमा थियो।प्राप्त जानकारी अनुसार यी दुवै चलचित्रलाई नायिका ऋचा शर्माले किनेकी हुन् ।
नायिका ऋचा शर्माले ‘चलचित्र टीभी’ नामक एउटा एप लञ्च गर्ने तयारीमा छिन् । केहीदिन अगाडि केही नायिकाहरूले ऋचालाई शुभकामना दिँदै भिडियो समेत तयार पारेका थिए ।
ऋचा जुनको २४ तारिखबाट यो एप सार्वजनिक गर्ने तयारीमा छिन् । अमेरिकामा रहेका केही लगानीकर्ता र नेपालमा रहेकी ऋचा शर्माले मिलेर यो एप तयार पारेका हुन् ।
दर्शकले एप डाउनलोड गरेर केही रकम तिरेपछि यो चलचित्र हेर्न सक्नेछन् । दुवै चलचित्रका लागि अहिले १०–१० लाख रुपैयाँ एड्भान्स रकम दिइएको बुझिएको छ । योभन्दा बढी रकम नाफा भएको खण्डमा निर्माता र ऋचाले फेरि सेयर बाँडफाँट गर्नेछन्।
