राष्ट्रियसभामा सांसदको प्रश्न : राहत दिने भन्दै किन ढाँट्छ सरकार ?
असार २०, २०७८
राष्टियसभाको बैठकमा सरकारले अघिल्लो वर्ष बाढी पीडितलाई घोषणा गरेको राहत अझै नदिएको भन्दै गुनासो गरेका छन् । गृहमन्त्री विष्णु पौडेलले बैठकमा बाढी प्रभावितहरूका लागि सरकारले गरेको कामको फेरिहस्त सुनाएपछि अघिल्लो वर्षका बाढी प्रभावितले यो वर्षसम्म किन राहत पाएनन् भनेर प्रश्न गरे ।
सांसद प्रकाश पन्थले बाढी पहिरो जस्ता विपत्तिका गृहमन्त्रालयको तयारी छेपारोको उखान जस्तो हुने गरेको बताए । उनले अघिल्लो वर्षका प्रभावितले अहिलेसम्म राहत नपाएको बताए । सांसद अनिता देवकोटाले कहिले बाढी पहिरो जान्छ र जाउँला भनेर सरकार बस्ने गरेको बताउँदै कुनै तयारी नगरेको उल्लेख गरिन् ।
यस्तै सांसद रामनारायण विडारीले कोसी, गण्डकी, महाकाली नदीमा अनावश्यक सम्झौता गरेका कारण नदीमा ढोका लगाएका कारण तराई डुबेको बताउँदै त्यहाँ बाढी रोक्न भारतसँग सरकारले के गरेको छ भन्दै प्रश्न गरे । सांसद उदया शर्माले लमजुङ बेंसीशहर बाटो कहिले खुल्छ भनेर जनताले फोन गरिरहेको बताउँदै गृहमन्त्रीको ध्यानाकर्षण गराइन् ।
सांसद शेरबहादुर कुँवरले अछामको रामारोशनमा अघिल्लो बर्ष भदौ २ गते बाढीले तहसनहस पारेको उल्लेख गर्दै त्यहाँ अहिलेसम्म राहत नदिएको उल्लेख गरे । सरकारले अघिल्लो बर्ष हिमालमा घरबास नहुनेका लागि ३ लाख, पहाडमा २ लाख र तराईमा १ लाख दिने भनेपनि अहिलेसम्म नपाएको जानकारी गराउँदै उनीहरुले कहिले राहत पाउँछन् भन्दै प्रश्न गरे ।
