काठमाडौंमा आजबाट ११ र १२ कक्षाका विद्यार्थीलाई खोप

भदौ ०४, २०७८     सम्पूर्ण कुरा

काठमाडौं महानगरपालिकामा आजदेखि कक्षा ११ र १२ का विद्यार्थीलाई पनि कोरोना भाइरसविरुद्धको खोप लगाइने भएको छ।

काठमाडौं महानगरपालिकाले सूचना जारी गरी १८ वर्ष पुगेका कक्षा ११ र १२ का विद्यार्थीलाई खोप लगाउन अनुरोध गरेको छ। उनीहरुलाई भेरोसेलको पहिलो डोज लगाइने भएको छ।

कक्षा ११ र १२ का विद्यार्थीलाई विद्यार्थी परिचयपत्रका आधारमा खोप लगाइनेछ। त्यस्तै, विश्वविद्यालय तहको परीक्षाको प्रवेश पत्रका आधारमा पनि १८ वर्षभन्दा माथिका विद्यार्थीलाई खोप लगाइने महानगरले जनाएको छ।

भेरोसेल खोप १८ वर्षभन्दा माथिका विद्यार्थीले मात्रै लगाउन मिल्छ। १८ वर्षभन्दा कम उमेरका बालबालिकाका लागि सरकारले फाइजरको खोप खरीद गर्न लागेको छ।

यससँगै काठमाडौं महानगरपालिकाले ४० वर्षभन्दा माथिका नागरिकलाई पनि भेरोसेलको पहिलो डोज लगाउने भएको छ। खोप लगाउन ३२ वटै वडामा खोप केन्द्र तोकिएको छ।

यसका लागि भदौ ४, ५ र ८ गते खोप कार्यक्रम सञ्चालन हुनेछ। विहान १० देखि साँझ ५ बजेसम्म खोप लगाइने भएको छ।
प्रत्येक वडामा तोकिएका खोप केन्द्रबाहेक थप खोप केन्द्रको व्यवस्था गरिएको महानगरले जनाएको छ।

जसअनुसार, सामाखुशीको राधास्वामी आइसोलेसन सेन्टर, बलम्बुको सशस्त्र प्रहरी बल अस्पताल, रत्नपार्कको वीर अस्पताल, महाराजगञ्जको शिक्षण अस्पताल, बानेश्वरको निजामती कर्मचारी (सिभिल) अस्पताल, थापाथलीको परोपकार प्रसूती तथा स्त्री रोग अस्पताल, महाराजगञ्जको नेपाल प्रहरी अस्पताल र छाउनीको वीरेन्द्र सैनिक अस्पतालमा खोप लगाउन सकिनेछ।