घोषणा मात्र कि पल र मलिकाको फिल्म पनि बन्छ ?
माघ १७, २०७८
म्युजिक भिडियोमा निक्कै रुचाइएपछि अभिनेता पल शाह र अभिनेत्री मलिका महतलाई लिएर चलचित्र बनाउन निर्माताहरु कस्सिए । पल र मलिकाले पनि म्युजिक भिडियोसँगै चलचित्र पनि साइन गरे । तर अहिले उनीहरुले साइन गरेका चलचित्रको चर्चा सेलाएको छ । मेकर पनि चलचित्र बनाउन कुरामा सुस्त देखिएका छन् । पल र मलिकाले केन्द्र मोसन पिक्चर्सको चलचित्रमा काम गर्ने पक्का भएको खबर बाहिरिएको थियो ।
तर केन्द्र मोसन पिक्चर्स आफैं चलचित्र बनाउने कि नबनाउने भन्ने दोधारमा छ । पल र मलिकाले चलचित्र ‘पर्खि बसे २’ मा पनि काम गर्ने पक्का भएको खबर बाहिरिएको थियो । तर यो चलचित्रको काम पनि अगाडि बढ्न सकेको छैन । चलचित्रका निर्देशक सौरभ चौधरी ‘प्रसाद २’ को तयारीमा छन् । यसैले उनले ‘पर्खि बसे २’ को काम कहिलेबाट शुरु गर्छन् टुंगो छैन । चलचित्र ‘सत्यम्’ बाट त मलिका बाहिरिसकेकी छन् ।
राजेश हमाल, पल शाह लगायतका कलाकारले अभिनय गर्न लागेको यो चलचित्र अब बन्छ कि बन्दैन भन्ने नै टुंगो छैन । पल र मलिका भने घोषणा भएका सबै चलचित्र निर्माण हुने बताउँछन् । उनीहरुले सञ्चारकर्मीसँगको कुराकानीमा भने, हो हामी केही चलचित्रमा काम गर्दैछौं । एकपछि अर्को चलचित्रको काम चाँडै नै शुरु हुन्छ । दर्शकले ठूलो पर्दामा हामीलाई चाँडै नै देख्न पाउनुहुनेछ । म्युजिक भिडियोमा निक्कै व्यस्त मलिकाले नयाँ चलचित्र भने साइन गरेकी छैनन् ।
