फागुन १ देखी हलहरु खुल्ने, चल्दाचल्दै रोकिएका फिल्महरु रिलिज गरीने
माघ २५, २०७८
कोरोनाभाइरस तेस्रो लहरको कारण बन्द रहेका काठमाडौंका फिल्म हलहरु फागुन १ गते देखि संचालनमा आउने भएका छन् । कोभिड-१९ संकट व्यवस्थापन केन्द्र (सीसीएमसी) को सिफारिसमा काठमाडौैं, भक्तपुर र ललितपुरका तीन सीडीओको संयुक्त बैठकले फिल्म हल, रात्रीकालिन व्यवसाय र विद्यालयलाई आगामी आइतबार देखि संचालन अनुमति दिने निर्णय गरेको हो ।
प्रशासनको निर्णयसँगै हल संचालकले फागुन १ गतेदेखि सेवा संचालन गर्ने तयारी थालेका छन् । काठमाडौं उपत्यका बाहिरका फिल्म हल संचालनको निर्णय चाहिँ सम्बन्धित जिल्ला प्रशासनहरुले गर्नेछन् । मुख्य मल्टिप्लेक्स चेन क्यूएफएक्सले तेस्रो लहरमा चल्दाचल्दै रोकिएका फिल्मलाई रिलिज गर्ने जनाएको छ । स्पाइडरम्यान, पुष्पा, कठ्पुतली, जापानी सुपरहिरो फिल्म एनिमे र चपली हाइट ३ चल्दाचल्दै रोकिएका थिए । नयाँ फिल्म रिलिज नहुने भएपछि फागुन २ गते परेको भ्यालेन्टाइन्स डे रित्तै हुने भएको छ ।
कोरोना महामारीअघिका वर्षमा भ्यालेन्टाइन डेमा फिल्म हेर्न दर्शकको घुइँचो लाग्थ्यो । एप्पल इन्टरटेनमेन्टले हलिउडको बहुप्रतीक्षित फिल्म किंग्सम्यानलाई फागुनको पहिलो शुक्रबार देखि रिलिज गर्ने भएको छ जसले गर्दा हल खुलेलगत्तै किंग्सम्यान आउने छैन । वितरक मनोज राठीले १ गतेसम्मको अवस्था हेरेर रवि तेजा स्टारर फिल्म ‘खिलाडी’ रिलिज वा नगर्ने निर्णय हुने बताए । भारतमा ११ फेब्रुअरीमै रिलिज हुने भएपनि नेपालमा चाहिँ यसबारे टुंगो लागिसकेको छैन ।
